Міністэрства культуры Рэспублікі Беларусь
Дзяржаўны літаратурна-мемарыяльны музей Якуба Коласа
ПРЭС-РЭЛІЗ
“Табой я жыў, табой жыву…”
Прэзентацыя кнігі, прысвечанай жонцы Якуба Коласа М. Д. Каменскай
29. 09. 2022 у 16.00 у Дзяржаўным літаратурна-мемарыяльным музеі Якуба Коласа адбудзецца прэзентацыя ўнікальнага выдання «“Табой я жыў, табой жыву…” Пра жонку Якуба Коласа», выдадзенага Выдавецкім домам “Звязда”.
Творчая спадчына і жыццё Якуба Коласа стварае бязмежную прастору для вывучэння. Пра народнага паэта напісаны сотні кніг, навуковых прац і даследаванняў, і вельмі каштоўным з’яўляецца выяўленне і публікацыя новых невядомых да сённяшняга дня фактаў.
Важнейшую ролю у коласазнаўстве адыгрываюць навуковыя працы родных Якуба Коласа. Як адзначае літаратуразнаўца Мікола Трус, “сямейны агмень, які годна падтрымліваюць Марыя, Вера і Васіліна Міцкевіч, – нязменны арыенцір для чулых душ, прывабленых энергетыкай Коласава слова”.
Выданне прысвечана Марыі Дзмітрыеўне Каменскай – спадарожніцы жыцця беларускага Песняра – і змяшчае ўспаміны блізкіх, сваякоў, фрагменты ліставання, дакументы і прысвячэнні, а таксама ўнікальныя фотаматэрыялы.
Якуб Колас вельмі любіў сваю жонку, яна была яго лепшым сябрам, першым крытыкам і дарадцай. Калі яе не стала, а памерла яна ў 1945 годзе ў хуткім часе пасля перамогі, Якуб Колас вельмі перажываў, ён пісаў: "Адчуваю сябе так, як бы мне адсеклі правую руку і адабралі палавіну душы".
Укладальніцы кнігі – унучка Якуба Коласа, даследчыца творчасці Песняра Вера Даніілаўна Міцкевіч і галоўны захавальнік фондаў Дзяржаўнага літаратурна-мемарыяльнага музея Якуба Коласа праўнучка класіка Васіліна Валер’еўна Міцкевіч – прапанавалі свае подступы да асэнвасавння ролі ў жыцці і творчасці Якуба Коласа яго нязменнай спадарожніцы Марыі Дзмітрыеўны.
У выданні арганічна спалучаюцца дакументальныя сведчанні і арыгінальныя творы, што забяспечвае і пэўную аб’ектывізацыю і прадстаўленні часу і чалавечых адносін, і жывое ўспрыманне даўніх эмоцый, турбот, асобасных повязей.
У прэзентацыі возьмуць удзел навукоўцы, творчая інтэлігенцыя, музейныя супрацоўнікі, прыхільнікі творчасці паэта, родныя і блізкія Песняра.
САРДЭЧНА ЗАПРАШАЕМ!
Тэл. для даведак: 8 (017) 270-17-02.
Афіцыйны сайт: www.kolasmuseum.com
e-mail: info@kolasmuseum.by
